2 Kings 13
1 猶大王亞哈謝个孻仔約阿施在位第二十三年，耶戶个孻仔約哈斯做以色列王；佢在撒馬利亞統治十七年。
2 佢行上主看做邪惡个事，像尼八个孻仔耶羅波安王恁樣害以色列人犯罪；佢一直無改變。
3 所以，上主向以色列發譴，使敘利亞王哈薛㧯佢个孻仔便‧哈達常常打贏以色列。
4 後來，約哈斯祈求上主，上主就聽佢个祈禱，因為佢看到敘利亞王樣般壓迫以色列人。
5 上主賜給以色列一個解救者；這解救者使以色列人脫離敘利亞人个壓迫。所以，以色列人又像以前共樣安居樂業。
6 總係佢等還係犯耶羅波安家族害以色列人犯个罪，無離開偶像，在撒馬利亞還留等亞舍拉女神个像。
7 敘利亞王險險消滅約哈斯个軍隊，將佢等當做禾埕个灰塵恁樣蹂踏，佢等只有賸五十個騎兵、十輛戰車、㧯一萬個步兵。
8 約哈斯其他个事，㧯佢英勇个所做，全部記在《以色列列王史》底背。
9 約哈斯死掉，葬在撒馬利亞；佢个孻仔約華施承接佢做王。
10 猶大王約阿施在位第三十七年，約哈斯个孻仔約華施做以色列王；佢在撒馬利亞統治十六年。
11 佢行上主看做邪惡个事，學尼八个孻仔耶羅波安王个壞模樣，害以色列人犯罪；佢一直無改變。
12 約華施其他个事，包含佢在戰場對抗猶大王亞瑪謝英勇个所做，全部記在《以色列列王史》底背。
13 約華施死掉，葬在撒馬利亞、以色列个王室墳墓肚；佢个孻仔耶羅波安二世承接佢做王。
14 先知以利沙發到絕症；佢會死个時，以色列王約華施去看佢，伏等緊噭緊喊：「阿爸啊，阿爸啊！以色列个戰車㧯騎兵啊！」
15 以利沙吩咐王：「你去拿弓㧯箭來！」約華施就拿來了。
16 以利沙喊以色列王準備拉弓，王就用手拉弓。以利沙將手放在王个手項，
17 王就照先知个指示打開向東片个窗門。以利沙講：「射箭！」王个箭一射出，先知就喊：「上主勝利个箭，就係贏過敘利亞个箭。你愛在亞弗攻打敘利亞人，直到將佢等消滅淨淨。」
18 接等，以利沙喊以色列王拿兜箭來，佢就拿來。以利沙講：「打地泥！」王打三擺就停下來。
19 神人以利沙發譴，對王講：「你應該打五、六擺，恁樣，你正能徹底贏過敘利亞人；總係這下你單淨做得贏佢等三擺。」
20 以利沙死掉；佢等就埋葬佢。逐年春天，摩押人弛崗打陣來侵犯以色列。
21 一擺，有人堵好在埋葬死人，忽然看到該群人來，就將屍體㧒入以利沙个墳墓，轉身就走。屍體一憑到以利沙个骨骸，死人就返生，企起來。
22 約哈斯在位期間，敘利亞王哈薛一直壓迫以色列人。
23 總係上主因為佢㧯亞伯拉罕、以撒、雅各有立約，就恩待以色列人，憐憫佢等，看顧佢等，還係毋肯消滅佢等，也毋拌得逐佢等離開佢个面前。
24 敘利亞王哈薛死掉；佢个孻仔便‧哈達承接佢做王。
25 以色列王約華施三擺打贏便‧哈達，將以前厥爸約哈斯時代被哈薛搶去个以色列城市收轉來。